ငါ့နာမည် “မိုးဇက်”တဲ့
ကမ္ဘာကျော် ဂီတပညာရှင်မဟုတ်
မိုးကိုဇက်ကြိုးတပ်သူလည်းမဟုတ်
လူတွေထဲက လူ
ကိုယ့်မျက်ရည်နဲ့ကို မိုးမိနေတဲ့သူ...
ငါဟာ “ဒီမွန်း”
ကဖျက်ကယက်တော့မလုပ် အပျက်ပျက်နဲ့သွေးထွက်
ဒဏ်ရာဒဏ်ချက်တွေသိပ်ပေါတဲ့ နတ်ဆိုးပေါ့...
ငါ့အခန်းထဲကြည့်စမ်း
အစိမ်းရင့်ရောင် မျက်နှာကျက်အောက်မှာ
တွန့်ကြေနေတဲ့ အသဲအပိုင်းအစတွေ
အစအဆုံးမရှိတဲ့ ဖွာလန်ကြဲကဗျာတွေ
ပန်းနုရောင်အတိတ်ကို ထုပ်သိမ်းထားတဲ့
ဒိုင်ယာရီနွမ်းနွမ်းတွေနဲ့ လွမ်းငွေ့ငွေ့ရစ်သိုင်း
စိုထိုင်းနေတုန်းပဲ...
ငါရေးခဲ့တဲ့ ကဗျာတစ်ပွင့်က
ဓါးတစ်လက်လို ထက်ရှခဲ့ရင်တော့
ခွင့်လွှတ်...ကောင်မလေး
နင်ပေးတဲ့ဒဏ်ရာတွေ
စာရွက်ပေါ် ကြဲပက်ရုံလေးသက်သက်ပါ
အမုန်းတဲ့လား....စိုးစဉ်းမှမပွင့်ခဲ့ပါဘူးကွာ
ငါဟာ နင့်အတွက်
အချစ်တစ်ခုသာပွင့်တဲ့ “သီးသန့်သစ်ပင်”ပါ
နင့်အပြုံးတစ်ချက်နဲ့တင်
ပန်းတွေ ပင်လုံးညွှတ်နေခဲ့တာပါ
နင်ချိုးဖျက်ခဲ့တဲ့ အကိုင်းအလက်တွေမှာတောင်
ငါ့အချစ်တွေ ပါခဲ့သေးတယ် သွေးစက်လက်နဲ့လေ...
နင်ခုတ်ထစ်တဲ့နေ့ရက်တွေမှာ လည်စင်းရင်း
ငါ့ဘ၀ရစ်သမ်တွေ စောင်းကြိုးပြတ်ခဲ့ရတာပါ....
ငါ ရှုံးခဲ့ပါတယ်....ငါ မမုန်းခဲ့ပါဘူး....ကောင်မလေး...
ငါ့ ရင်မှာရွာတဲ့မိုးကို စာရွက်ပေါ်ရွာချရုံလေး
ကဗျာရေးခဲ့တာပါကွာ.....။ ။
♥ မိုးဇက်ဒီမွန်း ♥
No comments:
Post a Comment